ممشى الملك عبدالله [ قصة من وحي الخيال ]

[[] E j R a M []]

في وقت مجهول

وفي احد الشاتات الصويته

المناسبة غير معروفة



خالد : منك منك احلى مايك يا بعدي كيف حالكم اخباركم ................................


كل المعتاد في الشات الصوتي مستانس وحالي حال نفسي وفي وقتها كنت اتوقع كل شي حلو في الشات كنت ماسك نفسي وقتها لان فيه واحد مسوي انه خفيف دم على العموم ووقتها كنت اتكلم وهو نفس الحالة والعالم ميته ضحك علي وعلى المسكين الي انحشر .

في يوم ما وعلى الصباح وفي نفس المكان

كنت اتصفح برنامج حلو اعجبني وكنت مستانس عليه وفالها وحالي حال نفسي وكان صفحة الشات الي كنت فيه اليوم الي راح وفي نفس الروم الي كنت اتكلم فيه وفالها الي استغربته اني اسمع صوت اغنيه اغنية احبها كنت دايم اغنيها الغريب بعد انو مافيه اي شي موجود على سطح المكتب الا شيئين بس البرنامج الي كنت اشتغل عليه والشات الصوتي الي انا كنت فيه .

سرت ادور على مصدر الصوت حتى لقيت المصدر للأغنية .
اول ما دخلت على شان اعرف من الي كان حاط الاغنية لقيت ان صاحب الاغنية طلع من الروم الي انا فيه وخرج من الشات ككل .

خالد : من الخبل هذا الي ذاب وجهه مسوي يعرفني ؟

عارف الكل يتسائل ليش سألت السؤال الغريب هذا .

على العموم مرت ايام وانا ادخل الشات وعلى الحال هذا الى ان اخذت شهرة غير اعتيادية سرت كل ما دخلت الشات استانسوا وفلوها لاني كنت اذا دخلت سويت مسابقات واستهبال وافتح مواضيع وطبعاً طرد في خلق الله .

فجأة

ومن غير سابق انذار

بدائت اشوف كتابات وكأن صاحب الكتابة يعاني من شي معين [ الخيانة ]

كنت وقتها على المايك وكنت اتلكم مع كم شخص والشخص الموجود نفس الشي يسأل نفس السؤال وكأنه يطلب مني اني اجاوب على السؤال

السؤال كان

اذا حبيت احد ووثقت فيه واعطيته كل شي وفي الاخير اكتشفت انه يخونك ويبي يسوي فيك مصيبة ايش راح تقدر تسوي ؟


ما كان علي الا اني ارد على السؤال


خالد : والله شوف يا بعدي اذا والله انت وثقت في الانسان هذا على طول فأنت غبي كان من المفورض من قبل ما تثق فيه انك تشوف اذا كان راح يكون وفي معاك ولا لا بعدين ليش الثقة هاذي على طول كذا هو حلو ولا اشلون ؟


طبعاً كانت اجابتي محطمة شوي ما كنت اتوقع انه راح يأثر على الشخص نفسة لانه وقتها كنت مستغرب ليش سؤال السؤال هذا وليش انا بالذات ؟


بعد كم يوم نفس الحالة

في الشات واسوي مسابقة على بطاقة شحن ابو عشرة <<< شحيح ما يبي يدفع هع هع
وقتها كنت مستانس لاني اشوفهم متحمسين ويجاوبون وفالينها

واذا بنفس صاحب الاسم [ ؟؟؟؟ ] داخل الشات لاكن المرة هاذي داخل ساكست يعني ما يقول شي بس يسمعني وانا اضحك واسوي مسابقة واستهبل على ذا والوم ذا .

بعد ما انتهيت من السابقة

جاني صاحب النك المجهول وقالي ليش قلت اني غبي يوم اني وثقت في احد ؟

قلت والله اذا وصلت فيك الغباء انك تثق في احد خاصة اليومين هاذي اقولك غبي انت واغبى من الغبي .

قالي طيب انت تعرف فلان صاحب النك الفلاني ؟

قلت ايه نعم هاذا عزيز وغالي علي بس ليش تسأل عنه ؟

قالي صديقك هذا حبني وحبيته وخاني وانا ما سويت له شي

قلت انا اشلون يعني حبك وحبيته وخانك وانت ما سويت شي ؟

قالي ممكن تكلمني على اني بنت لو سمحت ؟

قلت اها << فق >> يعني انتي بنت الحين وجاية تبين تشوفين حل للمصيبة الي انتي فيها ؟

قالت ايه نعم ابي حل للمصيبة الي انا عايشتها كل صوري وكل خرابيطي عنده .

قلت انتي مجنونه تعطينه صورك يا خبلة مجنونه انتي ؟

قالت ايه نعم حبيته وابيه يشوف حبيبته لازم يشوفها على شان ما يعيش مجرد خيال لاني ابيه انا لوحدي

قلت اها يعني تبينه لوحدك حلوه هاذي اعجبتني بالله اعطيني منها ثلاث كيلو اشلون تبينه لوحدك يعني ما يدخل شات ما يدخل مكان ثاني ما يسوي شي من هنا او من هناك ؟

قالت ايه نعم ابيه لي انا واحدي ما ابي احد يشاركة شي الا انا بس

قلت اجل الله يعينك عز الله بكرة تلقين صورتك في الجريدة وصفحة الوفيات

ضحكت البنت وقالت يعني الحين انت تستهبل وتستخف دمك ليش ؟

ابد لان الوضع ما يبيلها خوف وان شاء الله محلولة

قالت محلولة

قلت ايه نعم محلولة .

قالت اشلون راح تحلها وانا اقولك كل صوري عنده

قلت ان شاء الله محلولة مالك دخل اطلعي من الموضوع ولا يهمك ان شاء الله كل شي راح ينحل

قالت ايش ناوي عليه تبي تروح تقوله

قلت ايه راح اقوله ايش فيها يعني عادي

قالت عادي ؟ مجنون انت هو لو عرف انه انا كلمتك راح ينشر صوري لانه قالي كذا

قلت يا شيخة ما اتوقع

قالت وهيه خايفة ليش ما تتوقع اشلون ما تتوقع يعني انت ناوي تقوله اني انا كلمتك ؟

قلت ايه نعم ناوي اقوله وراح يمسحها كلها وراح تشوفين

قالت اجل اذا صار لي شي ما اعرف الا انت فهمت ؟

قلت زين ايش بتسوين يعني بترفعين علي قضية كلها كلمتين وراح يوافق يمسحها ولا يهمك ولا تاخذين في خاطرك شي واذا ما مسحها راح اجرب معه سالفة التهكير واسحب كل الصور وهو ما يدري عن السالفة كلياً .

قالت انت هكر ؟

قلت لا بس اعرف واحد يقدر يساعدني وينتظر مني بس اطلبه

قالت زين الله يعينك اجل انا لازم اطلع

طلعت البنت المسكينه من الشات وانا سرت افكر في الانسان الي ما توقعت في حياتي انه يكون فيه الدنائة هاذي كلها ليش يستغل البنت ويهددها اذا كلمت احد غيره راح ينشر صورها وربي عالم حقيرة صحيح .


مرت الايام وانا احول افتح الموضوع بس بشكل حلو على شان اضمن انه ما يزعل من كلامي ويروح يسوي الي في باله .

وفي يوم وفي احد رومات الشات

قلت كيف حالك يا بعدي ؟

طبعاً انا اكلم الان صديقي العزيز الي في الشات الي تشتكي منه البنت

قالي انا بخير يا بعدي وينك ما تنشاف انت وكرشتك ؟

قلت ابد تعرف دوام وخرابيط وضغط عمل وضغط مكينه هع هع هع

ضحك الرجال وقالي ياخي انا متضايق

سألته ليش انت متضايق ايش الي ضيقك

قالي ياخي انا اعرف وحدة حبيتها بس المشكلة عرفت انها تخوني

قلت اشلون تخونك علمني طلع كل ما في كرشتك اقصد في برطمك اقصد كل الي عندك طلعة

قالي والله يا خالد انا احبها بس دخلت وحدة من الشاتات ولقيتها موجودة متصلة مع شخص اتصال خاص على شان كذا انا تضايقت منها وما ابي اكلمها مرة ثانية وعندي الصور لها وراح انشرها .

طبعاً انا خذيتها فرصة

قلت اما تنشرها خبل انت تبيني اكسر راسك روق روق بس وخل البنت في حالها مالها دخل في السالفة يمكن تشابه اسماء

قالي تشابه اسماء يوم شافتني طلعت على طول

قلت يمكن تشابه الوان

قالي اما الوان تستهبل انت اقولك اول ما شافتني طلعت

قلت يمكن ريحتك شينه

قام يضحك ويقول انت خبل وربي انك اهبل ايش لي اكلم واحد مثلك ابيك تفهم اني انا احبها وما اقدر ازعلها بشي

قلت اها ما تقدر تزعلها طيب ممكن اطلب منك طلب هذا اذا انت تعزني مثل ما تقول

قالي ابشر بعزك تبي خمس ريال حق المقهى ؟

قلت تستهبل انت تبيني اجيك لبيتكم واوطا شاربك ؟

قالي يفداك الشارب ويفداك المشفط هع هع ما علينا ايش بغيت يا خالد

قلت ممكن والله لا يهينك تمسح الصور الي عندك يا فلان ؟

قالي امسح الصور ؟ يعني اخليها تروح كذا ؟

قلت ايه عادي مو انت تحبها وهيه تحبك بس اكتشفت انها تخونك اكيد الخيانة جات على شانها شافت فيك شي ناقص على شان كذا لقت الانسان الي تبيه خليها تاخذ راحتها وتعيش حياتها وانت بعد عيش حياتك وخل الناس في حالها من يدري يمكن اذا نشرت صورها راح يبتليك ربك وانت عارف ان الله قادر على كل شي صح ؟

قالي وصوته يتقطع ما ابي امسحها لاكن دام الي طالبها انت وربي البيت لأمسحها وامسح ابوها من مخيلتي ومن كل شي في حياتي .

قلت انا صح يا بعدي والله انك رجال ونعم الرجال

طبعاً انا احب اريش في الواحد خاصة الي تعبانه نفسيته لاني احس بمعاناته

على العموم مرت ايام واسابيع على الحالة هاذي

ودخلت البنت مرة ثانية وسار بينا حوار التالي :

[[] E j R a M []]

بعد مرور الايام والاسابيع

جات البنت وانا كنت موجود في الروم ومافيه احد وقاعد اتصفح موقع ثاني

في ثواني

سمعت صوت يقول [ اذا فيه صوت اضغط واحد ]

انا استغربت قلت ايش الصوت هاذا لا يكون من الموقع الي انا فيه ما دريت وقتها اني فاتح الموقع الخبل الي مافيه الا انا وقتها

شوي اختفى الصوت والصراحة الصوت كان في قمة الروعة << راح وطي مع الصوت >> شوي ومن دخلت لقيت رسالة خاصة في الشات استغربت من الموجود فيها كانت مكتوب في الراسلة الخاصة [ الضاهر اني ضاغطة عليك انا اسفة ] .

انا عرفت انها الخبلة ما غيرها على العموم مشيتها وقعدت اضحك وقمت اقول في نفسي ايه زين ما شفتي شكلي كان من جد ما تكلميني مرة وحدة وضحكت بعدها وكملت التصفح وسحبت على الموقع .


شوي

اسمع نفس الصوت [ لو سمحت يا ...... ممكن اعرف انت في ايش مشغول ؟ ] دخلت على الشات ولقيت الخبلة ماخذة المايك وتتكلم ضحكت وقلت وانتي ايش دخك .

قالت لا والله بس حبيت اشوف ايش تسوي , على العموم انا قلت ايش قاعد اسوي وفهمت البنت اني قاعد اتصفح وماني رايق شوي فتحت موضوع الصور وصاحبي .

قالت ممكن اعرف اشلون قدرت تخليه يمسح الصور ؟

قلت سواها يعني ولا اشلون ؟

قالت دق علي وقالي انو كل الي بيني وبينه انتهى وكل شي خلاص مسحة وراح يمسحني من حياته .

قلت اها طيب اوكيه كل ما عليك تسوينه انك تنسين انتي بعد

قالت اشلون انساه هو حبي انا احبة انت ما تفهم شي خبل كل وقتك ضحك في ضحك ما فكرت حتى للحضة انك تحب ليش ؟

قلت والله شوفي خبل ونمشيها لك ولا لو انا انسان ثاني كان اعطيتك باند اخليه يعلم في وجهك ثلاث سنوات ونص واربع سنوات زيادة مجاناً .

ضحكت البنت وقالت حتى الحين ما ادري احس انك لعاب ؟

ضحكت انا وقلت ايه العب في الدفاع في فريق مانشستر يونايتد !!! من جدك انتي لا اتوطا في بطنك قال لعاب ايش تقصدين بلعاب قصدك بنات يعني ؟

قالت ايه وهيه تضحك ايه نعم حق بنات من اسلوبك عارفة انك حق بنات كم بنت تعرفت عليها بصراحة ؟

قلت لحظة اممممممممممممممممممممم الى الان تعرفت على وحدة بس وهيه الحين اكبر مني والى الان احبها واموت فيها ولا اقدر على بعادها ابداً مهما كانت الضروف خاصة أن حبي لها زاد من اول ما فتحت عيوني وشفتها تعلق قلبي فيها والى الان احبها ولا افكر في يوم اتركها .

قالت ياااااااااااااااااااااااااااحظها يا ليتني انا ؟

قلت تخسين والله تسيرين انتي !!

قالت افا ليش ايش فيك قلبت على طول ؟

قلت انا اقصد امي يا مخ البعير امي يا خبلة قال ليتك قال روقي بس لا اعطيك على وجهك

ضحكت البنت وقالت الله يرجك يا شيخ قسم بالله اني غرت الحين

قلت غرتي خير ليش تغارين

بعدها بشوي سألتني سؤال محرج شوي وقالت انا اسمعهم ينادونك خالد انت اسمك خالد صحيح ودي اعرف هل انت متعلق في انسانه حالياً ولا ما حولك احد ؟

رديت عليها وانا اضحك قلت والله شوفي يا بنت الناس انا اولاً اسمي خالد وعارف نفسي جيداً ادخل ما اتميلح لاني انا خير شر اكره الي يتميلح واذبحه بعد واحشرة وافلم فيه فلم مو طبيعي اخلي الي يدخل يضحك يطلع ميت ضحك .

ثانياً لا مافيه اي بنت متعلق فيها حالياً القلب للبيع ماعد نبي حب ولا خرابيط .

ضحكت وقالت ممكن اشتريه ؟

انا يوم قالت كذا قلت اوكيه نفتح السوم اررررررررررررررربع وسبعين الف وثمان مية وثمانين درهماً

انا اول ما قلت كذا البنت ما قصرت فقعت ضحك وقالت وربي اني ارتاح اذا لقيتك لانك تتكلم ولا همك الدنيا عادي عايش حياتك ضحك ووناسة ليتني اسير مثلك

قلت عادي تقدرين تسيرين مثلي

قالت اشلون ؟

قلت بكل اختصار عالم النت عالم حلو ما اكذب وفيه تسير قصص مو طبيعية حلوة جداً جداً بس اذا انت داخل النت على شان تحب صدقني انت اهبل لان اكيد الي راح يكون في النت راح يدور على بنت او خلينا نقول بنت تدور على شاب وعلى هل الحالة بس على شان شي واحد وانتي عارفة وانا عارف صح ؟

قالت ايه نعم عارفة بس ايش هوه الحل ؟

قلت الحل طال عمرك انك اذا جيتي تدخلين النت طلعي قلبك وحطيه بعيد عنك وادخلي على شان شي واحد بس

قالت الي هوه ايش هوه الشي الواحد بس ؟

قلت الوناسة

قالت بس ؟

قلت ايه نعم الوناسة بس لا اكثر ولا اقل اجل بتدخلين تسوين نفسك جولييت تدورين على روميو خبلة انتي ؟

ضحكت البنت قالت والله نصيحة حلوة راح امشي عليها يعطيك العافية اخوي خالد

قلت الله يعافيك ولا يهمك الحين تقدرين تسوين الي تبينه

بعد ما طلعت البنت رجعت للموقع الي سحبت عليه وقمت انزل ثيمات على شان الجهاز البايخ حقي << يقصد جواله >>.

شوي الا واسمع واحد من الملاحيس الي في الشات يناديني على المايك انت يا ابو كرشة هيه يا ابو راس نايم الله يرجك تعال يا شيخ ابي اضحك .

تركت الموقع حق الثيمات وقفلت الصفحة الخاصة فيه ونزلت على الشات وكتبت على التكست ليش انت مزعج يا اخي انا قاعد اشتغل على موضوع مهم يهم الدورة الدموية

قال اوووووووووف يا دكتور روق بس وتعال خلنا نفلها

طبعاً الشخص الي كان على المايك هو نفسه الي كانت تحبة البنت

قلت اجل خلاص من حبكم يازين عزلنا ضحك قالي ايه خلاص [ يعني فهمها ] .

قلت اها طيب الله يوفقك وتلقى غيرها

قال ما عليك البنات على قفى من يشيل

قلت شوف البنات على قفى من يشيل بس كل بنت تختلف عن الثانية شف يا بعدي اذا انت انسان تبي تحب يا تحب بأخلاص ولا لا تحب مرة وحدة خل عنك حركات عيال الحواري لا العب في حسبتك تلعب بذيلك انت ووجهك وربي لأقصة .

قالي ايش فيك انت قالب علي اليوم هاه ؟

قلت لا والله بس فيه ثيم عيى يشتغل في جوالي على شان كذا حاقد انا هع هع هع هع

قالي اها بس ايش عندك مسوي انك تدافع عن البنات خير ؟

قلت لا والله مو على شان كذا بس يعني حرام يا خي وربي حرام تلعب في مشاعر الناس على الفاضي خلاص لقيت بنت خلاص حافظ عليها لا تخليها تحتاج شي حاول انك تعتني فيها على انك حبيبها مو بس على شانها داخلة شات وما ادري ايش خلاص يعني مالها مشاعر

قالي ايه عارف بس انت عارف انو البنت تلعب بمشاعرنا احنا كمان يعني حتى البنات فيهم نفس الحالة

قلت والله شوف انت سوي الي عليك وصدقني راح يتغير وجهة تفكيرها اذا شافتك مهمت فيها مو على طول شفتها مع واحد ثاني خلاص ضفي وجهك وراح اسوي فيك وما يخطيك وخرابيط امسكها اسألها ليش سويتي كذا ايش السبب اعرف ايش النقاط الي خلتها تدور على غيرك بعدين قرر سوي الي تبيه بس ابعد عن الفضايح خلك احسن من الك .

قالي اي والله كلامك صحيح

وبعدها بشوي دخلت البنت وصاحبي كان موجود

يوم شاف البنت دخلت تضايق وقالي انا بطلع تبي شي

قلت ايه اجلس ابيك انت وياها الحين

قالي ما ابي اجلس

قلت تجلس ولا اهفك الحين بالبلكة الي جنبي ؟

قالي خلاص خلاص بجلس

على العموم جلس معنا وبديت انا اتلكم على المايك وكعادتي اطلع على المايك بضحكة وبعدها ابدا اقولهم

منكم احلى من الحلى مايك

[[] E j R a M []]

طبعاً

بعد ما اجتمعو الحلوين عندي الحبيب والحبيبة الملاحيس

بديت انا اتلكم عن سالفة صارت لي قديمة جداً

وكان القصد منه اني اعلمهم ان الحب ما يجي لعبة ولازم الحبيب يوقف مع حبيبه مهما كانت الضروف ومن هل الكلام

شوي ما ادري الا الي قال يا رجال هي ما تبيني اصلا هي لو تبيني كانت ضحت على شاني

شوي الا هي تتكلم اقولك اسكت وربي البيت اني ضحيت على شانك بس انت ما تستاهل احد يضحي لك

وانا قاعد اسمع نقاشهم واقول مرة مع هذا والله انك صادق ومره مع هذي والله انك صادقة الين ما وصلو لشي ما توقعته كنت وقتها بعيد عن الجهاز تركتهم ياخذون راحتهم في كلام هذا كان من عندي انا الي سويت كذا على شان يكلمون بعضهم لاني الي عرفته انهم تركو سالفة الجوال وصار كل واحد ساحب على الثاني .

رحت شوي ورجعت ولقيتهم فالينها يضحكون

بيني وبينكم انا من ناحيتي فرحت انهم رجعوا لبعض

على العموم شوي الا واشوف هاذي الي كاتبت لي على الخاص هلا حبيبي احلى ولكم باك

انا استغربت قلت حبيبك من متى يا خاص << طبعاً على شان ما افضح الي معي >> قالت ايه نعم حبيبي وبراحتك انا اصلا حبيتك على شان كذا راح اترك حبيبي على شانك

طبعاً انا ما تحملت الكلام هذا وانفجرت على طول وقلت والله شوف يا خاص مو كل انسان تلقاه تلعبه وبعدين انا يا قلبو ما ابي اتعرف على احد حالياً لان الي فيني كافيني فياليت تخليك على الاول احسن لانه راح يفيدك اكثر من اني انا افيدك فا ياليت تخليني في حالي

كتبت على الخاص والله يا خالد انت ما ادري ايش الي خلاني اتعرف عليك ماني عارفة احس ان فيه شي فيني يبيك ايش هوه ماني عارفة

نزلت من على المايك وبديت اتفاهم معها على الخاص الخبلة .

قلت يا بنت الناس انا انسان ما انفع لك ولا انفع انحب روقي وخليكي في حالك

قالت اذا انت انسان ما تنفع اجل ليش عايش ؟

قلت ابي استانس بحياتي ما ابي اي شي يخرب علي وناستي عايش حياتي مثلي مثل اي واحد لا مشاكل لا حب لا خرابيط .

قالت لا حب لا خرابيط مو توك تقول ان الي فيك كافيك اكيد كنت تحب وحدة وسحبت عليك صح ؟

انا يوم قالت كذا ما قدرت اتحمل كلامها بديت اتكلم والنفس في الخشم تبي تطلع وتقتلها قلت لها يا بنت الناس ايه انا حبيت من قبل وكرهت نفسي لاني حبيت ولا ابي احب بعد كذا احد

قالت اها اجل عذبتك البنت ؟

ما اكذب عليكم كنت وقتها متعقد من شي اسمه حب وكاااااااااارهه كره مو طبيعي صار الي يقولي احبك اضحك في وجهه واحشرة واحشر نفسي معه بس على شان انسى وذكرتني هاذي الله يهديها .

على العموم قلت انا لها والله هاذي اشياء تخصني ما راح اقولها لأحد

قالت بس حابة اعرف اكثر عنك يا خالد كل الي ابيه بس انك تقولي ايش الي مخليك كذا مستانس ايش الي مخليك تطلع على المايك والي يسمعك يحبك على طول ايش السر الي مخلي كل الي في خاطري يبيك ليش انا ابيك ليش ابي اعرف احس اني راح اتعلق فيك يا خالد .

ضحكت في وجها وقلت تتعلقين فيني حلوه هاذي اجل وجهي طالع فيه حديد ومسكات مع الجمب تقول درج ولا خلينا نقول مرجيحة هاه ؟

ضحكت البنت وقالت مع كل هذا وكل الي اقوله لك وباقي دمك مثل وجهك

قلت انا والله اذا دمي مثل وجهي لا تحبيني وروحي فكري في الي تركتيه لاني انا ما راح اتعرف عليك ابداً .

قالت البنت وري يا خالد محتاجتك ابي اضحك ما ابي اتضايق ابي انسى همومي اابي انسى كل شي في قلبي .

قاطعتها وقلت شوي يا بنت الناس انا قلتلك قبل كذا وانتي داخلة النت اتركي شي اسمه حب وخرابيط ادخلي وفليها واطلعي يعني ضيعي وقت لا اكثر ولا اقل بس الضاهر عني استيعابك معدوم ولا ينفع حتى للأكل هع هع

قالت اشلون انساه وانت الحين ساكنه ؟

قلت انا الحين ساكنة ؟ من جدك انتي اقول خلي عنك الخرابيط الي ما راح تنفعك بشي وأتركيني في حالي الله لا يهينك .

قالت خلاص ايش رايك نسير اصحاب ؟

قلت اصلا من اول ما انتي داخلة الشات وسمعتيني وسلمت عليك الصداقة بدت يعني ما يحتاج

شوي قالت ممكن تعطيني ايميلك ؟

قلت لا

قالت ليش

قلت ابد امي تقول لا ترقم احد لانك باقي ما كبرت اذا طلع لك شنب رقم

ما صدقت البنت اني قلت كذا ماتت ضحك قالت خلاص لا مشكلة اعطيني اياه ممكن ؟

على العموم اعطيتها الايميل وكانت غلطة مني اني اعطيها الايميل .


بعد مدة طولت يعني حدود الشهر غبت عن النت لفترة ورجعت مرة ثانية ودخلت على الشات وأول ما فتحت الماسنجر حقي اشوف اضافة موجودة استقبلت الاضافة طبعاً ما ادري من مين شوي الا هيه داخلة علي تقولي وينك حرام عليك ذبحتني وربي كنت افكر انو صارلك شي .................................... الخ الخ الخ

طبعاً انا استغربت من هذا الي داخل علي يطلب ريال ما ادري ضايعة معاملته ما ادري مين

سألت قلت من انت وايش تبي ؟

قالت من انا انا صديقتك الي في الشات الفلاني

قلت ااااااااااهاااااااااااااااااااا ما اذكر << طبعا استهبال >>

قالت لا يا شيخ اقولك انا خويت صاحبك

قلت اها انتي صديقة صديقي عرفتك من نبرة صوتك

قالت من نبرة صوتي اشلون ؟

قلت لا ابد انتي اذا جيتي تكتبين على الماسنجر تكتبين ببراطمك

ضحكت البنت وقالت هي هي هي بايخة انت ووجهك

على العموم جلسنا مدة على الحالة هاذي يعني تقدرو تقولو شهر وانا اكلمها هي تكلمني

الى ان تعودت علي وتعودت انا عليها وبدينا نحشر الي في الشات سوى البنت تغيرت مية وعشرين درجة شمالاً صارت تطلع على المايك وتزبد لهذا وتعطي هذا كاف يعني طلعت لها عضلات .

جاني صاحبي الي اسمه صالح وقالي خالد ما تلاحظ شي ؟

قلت ايش هو ؟

قال ياخي البنت هاذي تغيرت كثير سايرة تطلع على المايك وتزبد قلت يا رجال خلها تفلها وربي الواحد يدخل النت يسكت لا يسكت يتكلم وماحد يدخل الشات الصوتي الا على شان يتكلم ويفلها مثل العالم والناس خلها يا رجال خلها .

قالي بس البنت ما تعطيني وجه اذا دخلت كأني دخلت على يهود اسلم ما تكلمني ولا تعطيني اي اهتمام .

قلت افا اما مافيه اهتمام يعني انتو ما تزاعلتو مع بعض وحليتوها ؟

قال ايه

قلت خلاص اجل كلها شوف ايش تقولك

قالي زين

على العموم انا خاش جو مع الحش واضحك شوي الا جايني تحذير صوت الجرس الي على الماسنجر والبلا انا كنت رافع صوت السماعات وما ادري الا ذا الصوت الي خلاني اتنكس على الكرسي ناظرت الا هيه الخبلة تقولي ان صالح عندي على الماسنجر وانا الصراحة ما ابي اكلمه قلت لها ليش ؟

قالت ما ابي بس كذا كيفي ؟

قلت انا كيفك حلوة هاذي كيفك اقول ردي عليه يالله

قالت طيب

على العموم انا ما تلقيت اي رد منها شوي الا اشوف خويي يقولي على الخاص في الشات انا قطعت علاقتي بخويتي

حسيت يوم قالها ان الدنيا ضاقت علي قلت ليش ليش تقطع علاقتك بها ايش السالفة

على العموم ضحك وقالي البنت ما تبيني تبيك انت

قلت انا اشلون تبيني انا ايش دخلني انا

قالي البنت عندك على الماسنجر وعارف انا الشي هذا من زمان بس ما عليك عادي دام انها معك بأعرف انها بخير لانك انت تستاهل كل خير وتستاهل من يحبك

قلت له اقولك روق والبنت بحذفها من عندي وصحيح حذفتها من عندي

شوي اشوف رسالة بريد الكتروني مكتوب فيها حبيبي ليش حذفتني ليش وانا احبك من كل قلبي اذا ما تبيني قولي ما ابيك وخلاص افتح الماسنجر ارجوك ابي اكلمك تكفى

انا من هول الكلمات هاذي حسيت اني سويت شي غريب سويت شي استحق واحد يجي يعطيني كف على عيني

بعدها بشوي اضفتها مرة ثانية

وطلعت من الشات

وجلست اكلمها على الماسنجر

قالت ليش يا خالد تحذفني وانا ما سويت شي

قلت ما سويتي شي تتركين حبيبك على شان خاطر انسان ماتعرفينه الا عن طريق شات لا اكثر ولا اقل

قالت لا بس

قلت لا تبسبسين ولا تقولين شي الي صار صار على العموم تبين شي

قالت ايه ابيك انت ارجوك لا تقولي لا

قلت انا طيب لا

قالت حرام عليك وربي اني متعلقة فيك بس يا خالد حس في نفسك شوي انت تستاهل من يهتم فيك وانا ابي اهتم فيك لاني عارفة انو في قلبك اشياء كثيرة تبي تقولها بس ما لقيت الانسان او خلنا نقول الانسانة الي تسمع كلامك وتحس بمشاعرك

قلت بس يا المنجمة اشلون عرفتي كل هذا ؟

قالت اعرفك من ضحكتك من صوتك فيك حزن مو طبيعي بس ما تبي تطلعه لأحد

الصراحة كلامة صحيح وعرفت نقطة ضعفي انا ما قدرت اتحمل قلت خلاص بعدين نتفاهم قالت ممكن طلب ثاني وربي ما اطلب منك شي بعدين

قلت عز الله بطلع مارد الدلة خير امري ايش بغيتي

قالت ممكن رقم جوالك اذا ممكن اذا لا عادي

قلت انا لا عادي خذي وغلطة مرة ثانية غلطة كبيرة

اعطيتها الرقم من دون ما افكر

شوي الا واقفل الجهاز ويجيني خالد الثاني ويقولي ايش فيه وجهك كذا انت كأنك مسوي مصيبة وتبي تنحاش منها

قلت لخالد كل الي صار

قالي اوووووووووف يا دب اثرك مجنون انت ليش سويت كذا

قلت ما سويت شي انا الي كنت ناوي اسويه صلح الوضع بس ما قدرت بدل ما اصلح الوضع انقلب ضدي

شوي جاتني فكرة سبحان الله قوية جداً فكرة خلتني اغير وجهة نظري بشكل كامل

شوي الا يقولي خالد انت ايش بلاك مرة وجهك منتفخ ومرة ابتسامة عريضة عسى ما انجنيت

قلت لا والله لا انجنيت ولا شي بس تعرف شي

قالي ايش

قلت الضاهر ان السالفة فيها حركة من حركات الاخويا هاذي اليومين

قالي الي هيه

قلت يبي يلعب علي بخويته على شان كذا مرسلها لكن ما عليه

قالي يعني الدعوة فيها لعبة

قلت ايه نعم فيها لعبة وراح اوريهم

شوي الا الجوال يدق

ورقم غريب ما سجلته

رديت الا صوت البنت نفسها

قالت خالد

قلت ايه نعم

قالت كيف حالك ؟

قلت والله تمام الحمد لله من معي ؟

قالت انا صديقة صالح وحبيبتك مستقبلاً

قلت بس يالواثقة ايش عندها

قالت لا بس انا احبك وانت لازم تحبني

قلت الوضع غصب يعني

قالت لا بس انا احبك يا خالد افهم انا احبك

قلت زين زين ما عليه

كانت نفسيتي تضيق كل ما قالت احبك كنت اكره الكلمه هذي

وفي يوم

طلبت مني طلب غريب شوي

قالت خالد

قلت سمي تبين شي

قالت ايه نعم ممكن اشوفك ؟

قلت تشوفيني

قالت ايه نعم اشوفك ابي صورتك

طبعاً الدعوة فيها لعبة على شان كذا حبيت العب انا نفس لعبتهم

وقلت خلاص لا مشكلة اجيبلك صورة لي

قالت متى ؟

قلت ما عليك تنامين تصحين تلقين صورتي عندك

قالت زين حبيبي تبي شي ؟

قلت لا ابد سلامتك

وقفلت الخط وبديت افكر اشلون ارسلها صورتي اشلون وجاتني الفكرة المناسبة وبديت في تطبيقها

[[] E j R a M []]

بعد التفكير في كيفية ارسال صورة للبنت

جاني تفكير ثاني وقمت اقول في نفسي دام ان البنت تلعب علي ليش ما العب عليها هيه بعد على شان اضمن اني سويت نفس الي تسويه فيني لاني راح اقابل الشر بالشر هع هع .

ظهرت على وجهي علامات شيطانية .

شافها خالد وقالي هيه انت ايش فيك تضحك كذا تراك تخوف انت تخوف خلقة وبديت اخاف من ضحكتك فيه شي في مخك

قلت ايه نعم فيه في مخي فكرة اجرجر الخبلة هاذي الي مسويه انها بتجرني هي وصالح الخبل ههههههههههههههههههههه

قالي ايش ناوي عليه يا خالد بالله عليك روق اعرفك انت اذا تهورت انت وكرشتك تسوي اشياء ما يسويها احد .

قلت لا ما عليك يا بعدي بس وين فهد

استغرب خالد وقالي فهد ؟ ايش تبي في فهد ؟

قلت ابيه ابي اصوره وارسل الصوره لها

قالي وهو يضحك ما لقيت الا فهد عاد ؟

قلت انا ايه لانه مثل ما هي تبي تلعب علي لازم العب عليها

قالي والله انت مشكلة يا خالد الله يعينهم عليك وعلى شرك المطلق

قعدت اضحك انا واتصلت على فهد وطلبت منه يرسلي كم صورة وسار الي كان ودي اياه

ارسلت الصورة بس مو صورتي

ويوم استقبلت البنت الصورة ارسلت رسالة مضمونها انت حلو بس ما ادري ايش فيك تقول منت حلو ؟

على العموم انا ضحكت وقلت حلو ؟ طيب اوريك الحلو ايش يسوي فيك وربي لأجننكم اثنينكم

مرت ايام واسابيع عل الحالة هاذي تطلب وارسل

وانا حسيت ان فيني شي متغير

بديت اشتاقلها كل ما مرت لحظة ما اكلمها

وقمت اقول في نفسي وانا ضايق

معقول تعلقت في البنت معقول اكون حبيتها وانا ما ادري ؟؟

على العموم دار في مخي عشرات الالاف من الاسأله الي ما اعرف ايش اجابتها

وفي يوم دقت علي وانا في الدوام وكانت متضايقة جداً وقالت خالد انا تعبانة حيل وما اقدر اتنفس

قلت انا افتحي فتحة جديدة في صدرك وشوفي الهوى الزين اشلون يجي ولا غيري الفلتر يمكن فيه غبار

البنت ما قصرت ضحكت وضحكت

انا ابتسمت بس كنت اتعذب من جوة

مرت الشهور وانا وهيه نلكم بعضنا وادركت بعدها ان الوضع الي كان قبل يعني مو لعبة بالعكس كانت فراق حقيقي فراق باين بس انا وقتها كنت متمسك في صاحبي صالح ولا ابي ازعلة

على العموم كل ذاك الوقت كنت افكر تفكير واحد بس

اشلون ارضيها واشلون اضحكها اذا هيه ضايقة وكنت اختلق قصص بس على شان تضحك وتستانس لاني كنت استانس اذا هيه مستانسة حسيت وقتها اني ما اقدر وكان اذا كانت ضايقة او مهمومة اخذ همومها ولا افكر في نفسي ابداً كنت اصهر على شان اعرف اذا نامت على شان ارتاح .

على العموم مرت الايام وانا احاول انسيها كل شي في حياتها كنت استهبل واضحك وانكت على نفسي كل هذا بس على شان راحتها كانت تدق علي متضايقة وتقفل مستانسة وناسية لك همومها .

وفي يوم

اليوم الي كانت فيها المصيبة العظمى

طلبت تشوفني على الهواء مباشرة

طبعاً قلت اشلون ؟

قالت ابي اشوفك ابي اسلم عليك وأتكلم معاك

قلت انا اوكيه ولا يهمك ان شاء الله

قالت وين تبينا نتقابل ؟

قلت امممممممممممممممممممم الممشى

قالت الممشى ؟

قلت ايه نعم ممشى الملك عبدالله تعرفينه

قالت ايه اعرفه

قلت خالص هناك نتقابل

قالت خلاص لا مشكلة

قفلت الخط وبديت انا افكر اشلون راح اقابلها وانا ماني صاحب الصورة اشلون راح اشرح لها اني مو انا نفس الشخص الي هي تحلم فيه وكيف ؟ وبدت التسؤلات المملة تسكن راسي شوي وانا مع خالد

قالي خالد ايش فيه وجهك منتفخ ايش بلاك انت ؟

قلت والله يا بعدي متوهق ولا ادري ايش اسوي

قالي الله متوهق افا عليك بس ايش فيك قولي ؟

قلت والله يا بعدي السالفة .................................................. ....وهذا كل مافي الموضوع

قالي أمممممممممم طيب ليش ما تخلي فهد يقابلها ؟

قلت اشلون يقابلها فهد راح تعرف انه مو انا لان صوته مو مثل صوتي ؟

قالي والله يا خالد مالك الا تخلي فهد يقابلها

قلت انا اوكيه وطبعاً متضايق انا حيييل لاني بخلي واحد غيري يقابلها وهاذي اكبر مصيبة واكبر غلط غلطته في حياتي

رحنى الممشى وكلمت فهد عن الاشياء الي عن طريقها ما راح تقدر تعرف انه انا او لا

شوي صوت الجوال المتصل البنت قالت وينك يا خالد ؟

قلت انا قريب يا قلبو

قالت يالله انا عند الممشى الحين ومنتظرتك

قلت انا اوكيه يالله انا جاي الحين

وصلنا الممشى ودرنا شوي على شان نشوف الوضع اشلون

نزلت انا وفهد وخالد ومشينا في الممشى ودقيت عليها وقلت وينك وحددت مكانها ورحنا لها

[[] E j R a M []]

بعد ما وصلت انا وخالد وفهد للممشى عرفنا مكان البنت الي راح اقابلها طبعاً مو انا الي راح اقابلها .

لا

الي راح يقابلها فهد على انه انا لاني استخدمت صورته

بدينا نمشي في الممشى ونسولف والصراحة كنت مشتاق اشوفها وفهد كان وقتها مرتبك

ومع الوقت

شفنا تلك الفتاة صاحبة العيون الرائعة الي لفتت انتباهي وانتباه من معي يعني راحنا في خرايطها .

كلمت فهد وقلت روح لها خلاص انت الحين خالد وانا راح اكون فهد قالي فهد خالد انا خايف قلت انا لا تخاف ان شاء الله ما راح يسير اي شي .

طبعاً اتجه فهد نحو تلك الفتاة الي من جد ابهرت الناس بشكلها

سلمت البنت على فهد وبدو يمشون في الممشى واحنى وراهم <<مسوين تعزيز >>

ومع الوقت لاحظت ان فهد بدا يتغير بدا شكلة يرتبك اكثر واكثر قلت يمكن حشرته البنت بكم سؤال على شان تعرف انه انا او لا .

شوي رجع فهد وقال خالد ما اضن ان الخطة نجحت الضاهر انها عرفت من انا وانت منو

قلت انا وقلبي يحترق لا لا ما اتوقع انها عارفة الشي هذا ابداً .

شوي قلت لفهد روح امشي مع البنت لاني الصراحة خايف عليها من الملاحيس الي في الممشى

وافق فهد ومشى معها

شوي اسمع فهد يناديني بأسمه على اني انا اسمي فهد

ويوم اللتفت

طاحت عيني على عينها تماماً

ومدت يدها على شان تسلم علي

ومديت يدي على شان اسلم عليها

وأول ما لمست يدي يدها

تقوف الزمن لبرهة وظهرت علي ابتسامات خفيفة ونظرة اشتياق لها وبدأت افكر ليش سويت انا كذا ليش ما اعطيتها صورتي الاصلية ليش كذبت عليها لكن انا كنت متوقع انها تلعب مع صالح على شان كذا ما حبيت اعطيها صورتي الاصلية ............................الخ الخ الخ

بعدها بقليل استيقضت وفكيت يدها وتمنيت الوقت باقي واقف وانا اناظر في عيونها

طبعاً البنت ذكية ما سوت كذا الا على شان تتأكد انو مو انا صاحب الصوت غيرت صوتي والحمد لله مشت على خير

على العموم انتهت المقابلة في اليوم الاول وبدت فيني حالة ضيق مو طبيعية احس ان فيه شي كبير جا على صدري

بديت افكر في البنت وبديت احبها بجنون غير عادي

سارت تملكني وملكتني بنظرتها

حسيت في نظرتها معانات حسيت اني دخلت داخل قلبها وعرفت ايش فيه وعدت نفسي من ذاك اليوم اني اعيش على شان خاطر ارضيها ومع الوقت انسيها كل الي تفكر فيه وكل الهموم الي عايشتها

ومن بعد هل المقابلة

صحيت

وبديت اسأل نفسي

ليش العب على البنت والعب في مشاعرها حرام صحيح يمكن تكون هيه تلعب في مشاعري لانها مسويه خطة مع صالح على شان يتعبوني لاكن احس اني مسوي غلطة كبيرة لازم اسوي شي قبل لا يطيح الفاس بالراس

وقدر الله ذلك اليوم واقرر اني اكلمها عن سالفة المقابلة الي صارت

وفي نفس الوقت طلبت تقابلني مرة ثانية وانا وافقت لكن هاذي المرة على شكلي الحقيقي يعني ماني فهد لا على شكلي انا خالد


ارسلت رسالة لها طبعاً بعد ما تشجعت وقلت فيها انو الي قابلك اول مرة ما كان خالد هذاك هو فهد اما خالد الي هو انا انا الي ابتسمت في وجهك يوم سلمتي عليه وجلس يناظرلك وانتي تناضرينة ................................الخ الخ الخ


شوي تدق علي تقولي ايش الرسالة هاذي يا خالد قلت هذا هو الصحيح اذا منتي مصدقة تعالي الممشى انا في انتظارك وراح تشوفين حبيبك على هيئته الاصلية

ويوم جينا في الممشى دقت علي وانا كنت واقف في نفس المكان الي جالسين فيه وتقابلنا فيه اول مرة

وفي ثواني

جات عني على عينها وهيه تكلمني بالجوال

وانا قلت لها شفتي ان كلامي صحيح يا بنت شفتي حبيبك على شكلة الحقيقي هذا هو خالد هذا هو الشخص الي حبيتيه ذاك الشخص كان بس على شان ما فقدك لاني صدق حبيتك وانا وقتها كنت خايف انها تكون لعبة لاعبتها لكن لعبة او غير لعبة هذا هو انا تقدري تسوين الي تبينه

[[] E j R a M []]

[ عاشر من تعاشر فلا بد من الفراق ]














بعد ما عرفت البنت شكلي الاصلي والي كان مو الشكل الي كانت تتمناه بدت عيونها تدمع

وبديت انا امشي معها واحاول اداريها واقولها ان الي صار غصب عني وما كان ودي اطيح في حبها وتكون لعبة ملعوبه منها ومن صالح

قالت اشلون قدرت تسوي كذا يا خالد مو حرام عليك تلعب في مشاعري

قلت انا ما لعبت في مشاعرك ولعبت في مشاعرك

قالت اشلون لعبت وما لعبت

قلت انا والله يا بنت انا الي سويته كان خوف على نفسي اولا وخوف على انها تكون لعبة رخيصة من العاب شباب النت على شان كذا اخفيت شخصيتي وشكلي القيقي لاكني ايقنت على انه الكلام الي صار مو لعبة سرتي تحبيني حقيقة على شان كذا اعترفت لك بشكلي الاصلي على شان تشوفين ان خالد صاحب الصورة المزيفة مو نفسه خالد الي تتمنينة على العموم انا مثل ما قلتلك يالغالية هذا انا قدامك سوي الي تبينه لاني ما اقدر اسوي شي الا اني ارضيك بأي شي .

قالت أشلون تسوي كذا يا خالد اشلون ما غلطت اشلون ما اكتشفتك اول مرة اشلون سلمت عليك وما حسيت بك وانت تناظر لي وتبتسم ما توقعت اني اشوف ابتسامة من شخص مثلك

قلت ليش ايش فيني انا مو انا امشي اكل اشرب مثل خلق الله ولا انا طالع من بيضة واكل حب ولا اتنفس كربون انا مثلي مثلك يعني مافيه اي تغير ابداً

قالت ماني عارفة احس اني مصدومة

قلت ما عليك يا بنت انا قلتلك اذا انتي تبين الفراق لا مشكلة انا عند وعدي بعد الموعد هذا ما راح تشوفين وجهي مرة ولا راح تسمعين صوتي ابداً ولا راح تذكريني نهائياً

قالت ايش ناوي تسوي

قلت ابي اسافر ابي اسافر وابعد عنك بأي وسيلة ما ابي اذكر اني حبيت انسانة بعد ما شلت كلمة حب واحساس الحب من قلبي انتي الي قدرتي ترجعين الحب لقلبي نعم انتي يا بنت قدرتي تنورين قلبي بحبك بعد ما كان مضلم وهمة الوحيد انه يضحك وبس قدرتي ترجعين احساسي الضايع الي كنت ادور عليه من زمان وقدرتي .

قاطعتني قالت بس يا خالد بس ارجوك ما اقدر سرت الحين اذا جيت اسمعك اغمض عيوني واسمع ايش تقول ما اتحمل انا ما اقدر تعبت

نزلت دمعة من عيني وقلت انا اسف يا بنت ما كان اقصد لاكن انا حبيتك وعلى شان كذا حبيت اكون صادق معاك ما ابي اكذب عليك هذا هو شكلي من يدري يمكن الله خلقني رجولي زيادة عن اللزوم وانا ما اعيب في خلقة

قالت ايه بس يا خالد اشلون قدرت تمثل التمثيلية اشلون ما اكتشفت من انت كلمتك وجات عيني على عينك اشلون ما حسيت اشلون ؟

قلت يا بنت الناس الي صار انك كنتي مسحورة بصورة شخص ثاني وعشتي مع الصورة بصوتي انا وكنت احاول اني انسيك كل همومك لاكن للأسف مهمتي صارت تحطيم وتدمير لكل الي كنت احاول اسويه بدلت حياتك كلها صارت كلها هموم في هموم كل الي كنتي تفكرين فيه وعايشته صار حلم كل الي صار انك كنتي تحلمين وصار وقت انك تقومي من الحلم وتعيشي حياتك مثلك مثل باقي الناس .

قالت اشلون اعيش من دونك

قلت راح تتحملين تعيشين معاي على شكلي هذا يا بنت ؟

سكتت شوي وقلت نفس السؤال

ردت علي ودمعتها على خدها اذا صاحب الصورة مو صحيح راح اعيش مع الصوت لوحدة

قلت مع الصوت ؟ يعني انتي الي تفكرين فيه الان الصوت بس ؟

قالت ايه ما اقدر اتخلى عنك خالد ما اقدر حتى لو طلعت مو انت صاحب الصورة لازم ما اقدر انت الوحيد الي حاولت تسوي اشياء ما سواها غيرك من الناس والله يا خالد اني تعرفت على ناس بس مثلك ما تعرفت على احد قدرت تنسيني همي كنت تحاول تضحكني وكنت اضحك غصب عني وكنت تراضيني بأي شي بس الحين اشوفك قدامي ماني مصدقة انه انت صاحب الصوت اشلون يا خالد اشلون قدرت ؟

قلت يا بنت اسمعيني اعترف اني كنت وقتها نذل مثلي مثل غيري من الناس كنت افكر مثلهم تماماً انا عشت حياتي وحيد على شان الي تشوفينه قدامك ايه نعم مافيني جمال مافيني بس الجمال مو كل شي وراح تعرفين كل هذا بنفسك .

قالت ما اقدر يا خالد اخليك لازم اعيش معاك باقي حياتي لازم يا خالد لازم

قلت ما اتوقع راح تقدرين ومع الوقت راح تنسين امري يا بنت ما عليك انا راح احاول اني انسانك بس صدقيني انتي قدرتي ترجعي في قلبي شي ما قدر الف انسان يرجعة اشكرك يا لغالية على كل شي .

قالت خالد ايش تقصد اشكرك ايش تبي تسوي ؟

قلت ولا شي يا بنت افا عليك بس انا حبيت اشكرك على كل الي سويتيه

قالت ليش تشكريني انا ما سويت شي انت الي سويت انتي الي فضيت نص وقتك على شان بس تسعدني والحين انا اجازيك بالكلام هذا واحاول اجرحك

ضحكت وقلت عادي يا قلبو ما صار شي بالعكس مثل الي يقول لجل عين تكرم مدينة ولا نسيتي ؟

ضحكت البنت وقالت مع ان الوقت مو حق خفة الدم بس ايش اسوي وربي اسلوبك في الكلام هو الي يضحكني

وقتها جا وقت الفراق المنتظر كل واحد يروح في طريقة راحت هيه من جهة وودعتها وهيه من دون وداع راحت من جهة ثانية لأسباب خاصة فيها مثل ما اعتقد .

دخلت السيارة ورحت على البيت وانا بالي مشغول ليش ما ودعتني وليش وليش وليش .

مرت ايام وايام على بالي انها راح تدق لأن من كلامها فهمت انها راح تكلمني بس على شان تسمع صوتي الي لاحظته ان البنت ما تكلمني ولا ترسل ولا شي

من ناحيتي انا ما حبيت ازعجها وفهمت من اسلوبها ان الي بيني وبينها انتهى وخلاص ومع الالم والاهات والتفكير والهموم الي صارت تجيني يوم بعد يوم لاحظت الوالدة التهور الصحي لي وجات وسألتني

قالت خالد ايش فيك كذا منت على طبعك تدخل مبتسم وتطلع مبتسم سلامات ويا ولدي عسى ما شر ؟

قلت ابد يمة ولا شي بس شي في خاطري

قالت شي في خاطرك ولا تحب ؟

ضحكت وقلت لا يمه انا احبك انتي بس ما احب غيرك

قالت بالله عليك تلعب علي وانا امك احس فيك يا خبل لا تلعب علي

قلت صحيح كلامك يالغالية انا حبيت بس خسرت الي حبيتها وتعبت على شان ارضيها

ضحكت الوالدة وقامت تقولي كلام دخل في اعماق قلبي من جوة حسيت ان الدنيا تغيرت الدنيا صارت شي ثاني بالنسبة لي

وفي اخر كلامها قالت وحسيت بكلمتها يوم قالتها [ جعلها يا ولدي اخر احزانك ]

ايه نعم الكلمة الي غيرت حياتي من الشين للأحسن ردت لي ابتسامتي على طول من دون اي تفكير نسيت كل شي بعد ما سمعت الكلمة هاذي قمت وسلمت على راسها وعيوني تدمع وانا اقول ليش فكرت ليش سويت وليش سويت هدتني الوالدة وقالت ما عليك يا ولدي خل الناس تعيش على حياتها الدنيا مافيها امان ونادر من يلقى قلب مثل ما انت تملكه بس خلاص يا خالد معد تنفع انك تضحي على شان احد عيش حياتك والي يحتاج لضحكة لا اوصيك ضحكة الين يطلع من طورة ضحكت الوالدة وتركتني .




بعد مرور اربع شهور من غياب المحبوبة المنسية وفي ممشى الملك عبد الله

كنا نمشي انا والشباب وما نفكر في احد نضحك ونستانس وكل واحد يذب في ثاني

الا اسمع الصوت الي من بعيد يناديني خالد خالد

وقفت ووقف الشباب وسألوني خير ايش فيك وقفت قلت فيه صوت يناديني قالو صوت يناديك الضاهر بديت تهذري

طلع الصوت لاكن المرة هاذي كانت اقوى وسمعها الجميع التفت لمصدر الصوت وشفت الي ما توقعته

ايه نعم البنت الي راحت وقدرت انساها اشوفها قدامي واقفه وعلامات الابتسامة على وجها

قربت منها وقلت انتي البنت قالت ايه نعم انا حبيبتك يا خالد حبيت اقولك اني تعرفت على شاب بس طلع ما يسوى عندك شي وسوى شي ما توقعته ورحل وخلاني خالد محتاجتك ارجوك لا تتركني .

ضحكت في وجها وقلت تركتك اشلون تركتك وانتي الي رحلتي عني ما ادري انتي حية ولا ميته ولا ايش صار فيك اشلون اتركك وانتي الي رحلتي من دون وداع ولا حتا ابتسامة والحيت ترجعين تقولين ارجع اشلون ارجع وانا كرهتك وكرهت اسمك اشلون ارجع وانتي الي تركتيني بجروحي تعالجها الزمان اشلون علميني وين الوعد وين الكلام الي قلتيه اشلون اتركك يا خالد اشلون اعيش من دونك هذاك انتي عشتي هذاك انتي عشتي حياتك .

قالت خالد انا ما سويت الشي هذا الا على شان انسى وما قدرت انسى خالد ارجوك لا ترحل عني مثل ما سويت انا خليك احسن مني ارجوك

قلت انا الان احسن منك بكثير احسن منك اني رجعت على شخصيتي الاصلية الشخصية الي عشتها قبل ما اشوفك وقبل ما اتعرف عليك انا اسف يا بنت سامحيني ما اقدر اعيش معاك واغصبك على انك تعيشين معاي عيشي حياتك يالغالية ولا اوصيك مهما صار ومهما حصل اذا حزنتي اعرفي مو بس انتي الي تحزنين فيه غيرك يحزن لحزنك بس اذا انتي تستاهلين انا اسف يا بنت الي بيني وبينك كان مجرد كلام وصوت لا اكثر ولا اقل انتي الان محتاجتني على شان تضحكي وتستانسي على شان بس توخري الضيقة الي في صدرك مثل ما سويت انا تقدري انتي تسوينه .

قالت اشلون ؟

قلت سهل جداً سجادتك وادعي ربك انه يرحمك ويرحم جميع المسلمين اعتبريني موت يا بنت اعتبريني مجرد سراب لان الي بيني وبينك انتهى خلاص أنتهى ولا تخافين راح ادعي الله انه يفرج همك ويهديك على شان ما تطيحين في نفس الخطاء مرة ثانية .

كانت هاذي اخر كلماتي لها وابتعدت عنها وهيه تناظر لي ومستغربة اشلون قدرت انساها بالسرعة هاذي كانت البداية في نفس الممشى وانتهت في نفس الممشى

وكانت قصتي هيه قصة [ ممشى الملك عبدالله ] .

[[] E j R a M []]

الضاهر ماحد اعجبته القصه

ههههههههههههه

[غمـ الكون ـوض]

قصة رااااااااااااااااااااااااااااااائعة جدا

توني أقراها

ما ادري وش أقول


بس الحمدلله ربي فكك منها وعافاك من حبها والا الحب هلاك


انت غلطت من البداية والا البنت كتاب مفتوح من اللي سوته مع صديقك


ماشاء الله عندك الجرأة أنك تكتب قصتك كاملة


الله يرزقك بالزوجة الصالحة اللي تسعدك وتصونك



لكـ خالص شكري

[[] E j R a M []]

ههههههههههههههههههههههههههههه

قصة حلوة صحيح

بس الحمد لله ما كل ما يناله المرء يدركه

هههههههههههههه

وخلاص بطلنا ماعد فيه حب ولا فيه غيره

احترام وبس غيره ما فيه

هههههههههههههههه

يسلملي المرور الحلو ياحلو